თბილისის MB მოდის კვირეულის მიმოხილვა ინსაიდერებისგან

დასრულდა მერსედეს-ბენცის თბილისის მოდის კვირეული, რომელსაც ორგანიზებას სოფო ჭყონია უწევდა. ქართველმა დიზაინერებმა მრავალფეროვანი კოლექციები შემოგვთავაზეს და დადებითად გაშუქდა მსოფლიო პრესაში, მოდის კვირეულის ორგანიზების საკითხი მაღალ საფეხურზე იდგა. თბილისის პოდიუმს დაუბრუნდნენ ავთანდილი და ბიჭოლა!

წარმოდგენილი კოლექციების წარმატებაზე პოდიუმს მიღმა ნანახი ლუქები მეტყველებს. მოდურმა ქალბატონებმა და უცხოერმა ბლოგერებმა უმალ მოირგეს სამოსი და აქსესუარები ქართველი დიზაინერების უახლესი კოლექციებიდან. მაგალითად ნინა ზარქუას გიორგი ქებურიას ჩვენების მეორე დღესვე ემოსა ვარდისფერი კოსტუმი, რომელსაც გვანცა ჯანაშიას ყელსაბამი-ჯაჭვი შეუახამა.

სალომე მიქაშავიძე,
მოდის PR და გაყიდვების სააგენტო NOIZY

"სამწუხაროდ ბევრ ჩვენებას ვერ დავესწარი, რადგან მე თვითონაც ვმუშაობდი კულისებში და შესაბამისად იქ ვნახულობდი კოლექციებს. ჩემი აზრი საკმაოდ სუბიექტური იქნება ამ შემთხვევაში, რადგან ვმუშაობ რამოდენიმე ბრენდთან და ამიტომ ცოტა უსამართლოც შეიძლება ვიყო:)) თვითონ მოდის კვირეულს რაც შეეხება წელს ბევრად ორგანიზებული იყო ყველაფერი ვიდრე აქამდე ყოფილა, ზოგადად სეზონიდან სეზონამდე უკეთესობისკენ იცვლება ყველაფერი, რაც ძალიან კარგია და იმედია ესე გაგრძელდება, სტუმრების რაოდენობა და სტატუსიც მაღლა იწევს, რაც ძალიან ეხმარებათ დიზაინერებს საერთაშორისო ბაზარზე გასვლაზე."

ტატო ორაგველიძე, დიზაინერი

"ვადევნებდი თვალს მოდის კვირეულს, და გარდა ამისა ჩართული ვიყავი როგორც მატერიელის დიზაინერი. თუმცა მატერიელის რანვეი ჩემი არ ყოფილა, მთლიანობაში საკმაოდ ძლიერი სეზონი გამოვიდა. მომეწონა დიზაინერების მიდგომა მდგრად მოდასთან დაკავშირებით. საერთოდ მომწონს, რომ ქართველი დიზაინერები მსოფლიო გამოწვევებს მარტივად უღებენ ალღოს და ცდილობენ კონტექსტის გათვალისწინებას ინდუსტრიასთან მიმართებაში. კონკრეტულად ვინმეს გამოყოფისგან თავს შევიკავებ."

გიორგი ჩემინავა,
ბრენდ კონსულტანტი

"აკა ფროდიაშვილის შოუ პირველ დღეს იყო ძალიან ლამაზი: ლოკაცია ძალიან მოუხდა, პერსონაჟები... აკას ჩვენებები მოდის კვირეულს ძალიან საინტერესოს ხდის. ალექსანდრე ახალკაციშვილის კოლექცია იყო შეკრული და ძალიან ქალური, მომწონს რომ თავისი ჩამოყალიბებული სტილი აქვს, რომელსაც არ სცდება. ინგოროყვას კოლექციიდან ჩავიცმევდი ძალიან ბევრ რამეს და ამ სეზონზე ნამდვილად ჰაილაითი იყო და როგორც ყოველთვის ხარისხიანი. და რა თქმა უნდა დალოოდი, თავისი ერთ-ერთი ყველაზე ძლიერი კოლექციით!"

ნათია ჯგუბურია, სტილისტი

"10-მდე ჩვენებას დავესწარი საიდანაც რამდენიმეს გამოვყოფდი: ალექსანდრე ახალკაციშილს, გვანცა სალაყაიას და გიორგი ქებურიას. გამოვარჩევდი ტანსაცმლის შესრულების ხარისხს, დეტალების მიმართ სკურპულოზურ დამოკიდებულებას და მათ ძალიან სუფთა შესრულებას. ასევე აღსანიშნავია ანუკის ჩვენება, სადაც ლოკაცია, პოდიუმი, ფერები და ყანჩელის მუსიკა, ყველაფერი იყო იდეალურად შერწყმული და კარგი სანახავი. ცოტაა ეგეთი ჩვენებები. იმედია მომავალში მეტი დიზაინერი შეძლებს გამართული და საინტერესო შოუს გაკეთებას."

თეო, Look Models

"ბიჭოლას შეკრული, ლამაზი კოლექცია ქონდა. ძირითადად ჩემს ლუქებს დავაკვირდი და ფავორიტი იყო" - ამბობს მოდელი, რომელმაც თავად რამდენიმე ლუქი წარადგინა პოდიუმზე - "რუსაძემ გააცოცხლა ძველი დრო, ძალიან საინტერესო სახეები ყავდა და კარგი გამოვიდა. გამიხარდა ავთანდილის დაბრუნება წელს და როგორც ყოველთვის ულამაზესი კოლექცია ქონდა. აქაც ძირითადად ჩემი ლუქები მომეწონა და წარმატებას ვუსურვებ. ბესარიონი კი როგორც ყოველთვის რჩეული იყო."

თემატური ნიუსი: MBFW ავთანდილი, ბიჭოლა, დათუნა და ბესარიონი!

ივანე ქეშიკაშვილი,
მოდის ბლოგერი, სტილისტი

"ვისაუბრებ დიზაინერებზე და აღვნიშნავ, რომ მართლაც საინტერესო კოლექციები წარმოადგინეს. უბრალოდ ნაკლებად ვიხილეთ გაზაფხული-ზაფხულის კოლექციები და მეტად იყო წარმოდგენილი თბილი სამოსი. დიზაინერებმა უკვე კარგად გაითავისეს საერთაშორისო სტანდარტები და ამის მიხედვით დაიწყეს შოუების კეთება. ჩემთვის ყველაზე საინტერესო და გამართული კოლექცია წარმოადგინეს ნინო ბაბუხადიამ, ლაკო ბუკიამ და ირაკლი რუსაძემ. საინტერესო და გამართული კონსტრუქციები, ფერთა გამა და სილუეტები მართლაც იყო ახალი, ინოვაციური და დასამახსოვრებელი. ბაბუხადიას კოლექციაში იკითხებოდა კარგად ნაფიქრი და შესრულებული ნაქარგები, რომელიც ღია პასტელურ ლუქებს ახალისებდა. ასევე ლაკო ბუკიამ მართლაც წარმოადგინა გაზაფხული-ზაფხულის კოლექცია თავისი ფერებით, ქსოვილების პრინტებით და სილუეტებით. ირაკლის კოლექციას უფრო მეტ შთამბეჭდაობას ჩვენების ლოკაცია მატებდა, რომელიც საინტერესოდ წყვეტდა კოლექციის იდეას.

აღსანიშნავია ის ფაქტიც რომ ქართველმა დიზაინერებმა უფრო მეტად დაიწყეს მამაკაცის სამოსის წარმოება და რამდენიმე ბრენდმა პოდიუმზეც წარმოადგინა მამაკაცის ლუქები, მაგალითად თამუნა ინგოროყვამ. ასევე კვირეული იღებს უფრო მეტად საერთაშორისო სახეს, რასაც მისი შოურუმი მოწმობს. შოურუმში წარმოდგენილი იყო როგორც ქართველი, ასევე უამრავი უცხოელი დიზაინერი."

ლალი გუშიკაშვილი,
ბლოგერი

"გამორჩეული წელი იყო. ძლიერი კოლექციები ვნახე, ბევრად გაზრდილები არიან დიზაინერები. მინდა ყველას წარმატება ვუსურვო, მაისის კვირეულს ველოდები დიდი იმედებით. დარწმუნებული ვარ კიდევ უფრო გაძლერებულ და დახვეწილ კოლექციებს შემოგვთავაზებენ."

სვეტა Indostar Bazaar-დან, რომელიც რუსეთში ქართველ დიზაინერებს წარმოადგენს, გვიზიარებს, რომ ამ სეზონზე მისი მოწონება დაიმსახურეს: ლაკო ბუკია, ლალო, ალექსანდრე ახალკაციშვილი, Matériel და ბაბუხადიამ.

იანა კობალაძემ College Store-ს დამფუძნებელმა აღნიშნა, რომ რადგან დიზაინერების უმეტესობა მისი მეგობარია გაუჭირდება ფავორიტების დასახელება, თუმცა გამოყოფდა: თამუნა ინგოროყვა, ლალო, ჯანაშია, ალექსანდრე ახალკაციშვილი და გიორგი ქებურიას კოლექციებს.

მერსედეს-ბენცის თბილისის მოდის კვირეულის კოლექციების გასაცნობად თვალი ადევნეთ პუბლიკაციებს EDITORIAL.ge-ზე და მიყევით Mercedes-Benz Fashion Week TBILISI-ის ფეისბუქ ფეიჯს;